Алматы жастарының белсенді диалогы: G35 оқу жылын стратегиялық кездесумен бастады

12 ақпанда Алматы қаласындағы жоғары оқу орындарының студенттік ұйымдары жетекшілерінің осы оқу жылындағы алғашқы отырысы өтті. Кездесу қала университеттерінің студенттік өзін-өзі басқару органдарының басшыларын біріктіретін «G35» алаңында ұйымдастырылды.

Іс-шара алдағы конституциялық өзгерістерді және жастардың қоғамдық үдерістердегі рөлін талқылауға арналған ашық диалог алаңына айналды. Кездесудің негізгі назарында студенттердің азаматтық күн тәртібін қалыптастыруға белсенді қатысуы, құқықтық мәдениетті дамыту және ел болашағы үшін жауапкершілікті арттыру болды.

Кездесуге ерекше құндылық қосқан Ғұмарбек Дәкеев атындағы Алматы энергетика және байланыс университетінің лабораторияларын аралап көруге мүмкіндік беріліп, университеттің ғылыми әлеуеті мен студенттер үшін заманауи мүмкіндіктер таныстырылды. Ұйымдастырушылар университет басшылығына көрсеткен ықпалдастығы мен жылы қарсы алу үшін алғыс білдіреді.

Қатысушылар өз пікірлерімен бөлісіп, өзекті сұрақтар қойып, студенттік қауымдастықтың реформалық үдерістерге қатысуының маңызды екенін атап өтті. Бүгінгі таңда жастар жаңа көзқарас, бастама және тиімді серіктестік арқылы оң өзгерістердің қозғаушы күші болып отыр.

Кездесу аясында алдағы жиындардың кестесі бекітіліп, ағымдағы оқу жылына арналған негізгі жұмыс бағыттары айқындалды. Басымдықтардың қатарында бірлескен қалалық жобаларды жүзеге асыру, жоғары оқу орындары арасындағы ынтымақтастықты дамыту, студенттік бастамаларды қолдау және жастардың кәсіби әрі әлеуметтік дамуына жаңа мүмкіндіктер қалыптастыру бар.

Мұндай кездесулер жастар қауымдастығы, университеттер мен қалалық институттар арасындағы диалогты нығайтып, Алматыны белсенді әрі бастамашыл жастар қаласы ретінде дамытуға үлес қосады.